परमप्रभुको सन्दूकभित्र हेरेकै कारणले गर्दा किन परमेश्वरले बेथ–शेमेशका मानिसहरूमाथि डरलाग्दो न्याय खन्याउनुभयो (१ शमूएल ६:१९) ?

पलिश्तीहरूले इस्राएलीहरूलाई पराजित गरी परमप्रभुको सन्दूकलाई आफ्नै इलाकामा ल्याएका थिए । परिणामत: तिनीहरूका बिचमा विभिन्न किसिमका विपत्तिहरू आइपरे । त्यसैले तिनीहरूले करारको सन्दूकलाई इस्राएलीहरूकै भूमिमा फर्काइदिन चाहे । दुई ओटा गाईद्वारा नारिएको गाडामाथि तिनीहरूले सन्दूकलाई राखे । चालकविनाको त्यस गाडालाई तिनीहरूले जान दिए र गाडा बेथ–शेमेशमा आइपुगे । “तर परमप्रभुले बेथ–शेमेशका केही मानिसहरूमध्ये सत्तरी जनालाई मार्नुभयो, किनभने तिनीहरूले परमप्रभुको सन्दूकभित्र हेरेका थिए” (१ शमूएल ६:१९) ।  के सन्दूकभित्र हेरेकै कारणले गर्दा परमेश्वरले यति भयानक दण्ड ल्याउनु अनौठो कुरो होइन र ?

जब हामी पुरानो करारमा परमप्रभुको सन्दूक र यसको महत्त्वबारे बुझ्दछौँ हामीलाई तिनीहरूमाथि आइपरेको परमेश्वरको डरलाग्दो न्याय अनौठो लाग्दैन । बेथ–शेमेशका मानिसहरूका अपराध पनि डरलाग्दो नै भएकाले तिनीहरूमाथि डरलाग्दो न्याय आइपरेको हो ।

परमप्रभुको सन्दूक अर्थात् करारको सन्दूक परमेश्वरको उपस्थितिको प्रतीक थियो । यसलाई पवित्र वासस्थानको महापवित्रस्थानमा राखिन्थ्यो । परमेश्वरको पवित्रता र मानिसको पापमय अवस्थाको कारणले गर्दा करारको सन्दूकलाई सम्हाल्ने विषयमा परमेश्वरले इस्राएलीहरूलाई विभिन्न नियमहरू दिनुभएको थियो (प्रस्थान २५:१०–२२; २६:३२–३४; ३७:१–९) । यी नियमहरूले परमेश्वरको पवित्रतालाई जोड दिन्थे जहाँ पापी मानिसको उपस्थिति हुन सक्दैनथ्यो । सन्दूकलाई खोलेर हेर्नु त धेरै परको कुरो यसलाई छुन पनि निषेध गरिएको थियो (गन्ती ४:१५) । करारको सन्दूकसम्बन्धी यी आज्ञाहरूको उल्लङ्घनले मृत्यु लिएर आउँथ्यो । बेथ–शेमेशका मानिसहरूले जानाजानी परमेश्वरको इच्छाको विरुद्धमा पाप गरेकाले तिनीहरूमा यो भयानक दण्ड आइपरेको थियो ।

Leave Your Comments Here.